- Басты бет
- /
- Жаңалықтар
- /
- Мәдениет
- /
- «Сөз Маржан» Collaboration Fest»: АҚ АРМАНЫМ - АҚ ГҮЛІМДЕЙ СОЛМАЙТЫН
«Сөз Маржан» Collaboration Fest»: АҚ АРМАНЫМ - АҚ ГҮЛІМДЕЙ СОЛМАЙТЫН
«Сөз Маржан» Collaboration Fest».
КӨШЕРБАЙ МАҚПАЛ
2007 жылы 18 қарашада Ұлытау облысында дүниеге келген. Жезқазған қаласындағы «Абай атындағы мамандандырылған мектеп-интернаты» КММ оқушысы. Республикалық «Абай әлемі» байқауының 3-орын иегері, республикалық «Тәуелсіздік – мәңгілік елдің тұғыры» атты айтыстың 3-орын иегері. Облыстық Мағжан оқулары байқауында «Ақын да бір бала ғой айға ұмтылған» аталымы бойынша 1-орын иегері.Облыстық Мәшһүр-Жүсіп оқулары байқауында “Алдыма өлең жаз деп қағаз келген, Сөзімді сөйлеп бақытым мен де білген” аталымы бойынша бас жүлде иегері.
Абайға арнау
Нәр алам мен жырларыңнан сыр тұнған,
Мен жас желек көктемеде құлпырған.
Түзу жолға бағыттадың біздерді,
Жадымда тұр жазған сөзің, түр-тұлғаң.
Өлеңменен жабулаймын бүгінді,
Жаңғыртамыз әлі талай үніңді.
Сіз қалдырған қара өлеңнің киесін,
Артыңдағы жас ұрпағың ұғынды.
Қайта-қайта сені оқимын таң қалам,
Бәрін қалай жазып кеттің нар бабам.
Толқындайын тасып келем өлеңмен,
Толқын болып бабам ізін жалғағам.
Хәкім Абай маздатады жыр отын,
Жол көрсетіп, жұллыздай боп тұратын
Данышпанға дала басын иеді,
Қара сөзі жадымызда тұнатын.
Салт-дәстүрді сіңіреміз сөзінен,
Дін кәләмді үйреткен ол төзіммен.
Ойсыздарға ой салады бұл сөздер,
Бәрін ұқтық даналықтың көзінен.
Қалықтасам, көкке биік аспанға,
Асып жатсам көкжиек, тау-тастан да.
Қуаныңыз ұрпағыңыз барына,
Абай атын көтеремін асқарға!
(Мәшһүрға арнау)
Өлеңін ұлағатты үлгі етемін
Көңілге ұялайды күнде сенім.
Саралап иман жолын дәріптейді,
Кім білмес мәшһүр болған тұлға екенін.
Заманның ағымы да баяуласа,
Ғылымға жанын салып аянбаса
Еліне “Мәшһүр болар жан екен”-деп
Үндемей үкі таққан Жаяу Мұса.
Аралап дүниенің бар қызығын
Көрген бе, көрмеген бе жар қызығын?
Жұт жетіп, түгел малы қырылғанда,
Сезген ғой сонда өмір таршылығын.
Білім деген ақыл боп қонса керек,
Адамға жан жолдастай болса керек.
“Адамға малың жолдас болмайды”-деп,
Баласын үлкен жолға салса керек.
Жаттаған сегіз жастан дастан, жырды,
Көрдіңдер мұндай топтан асқан кімді?
Болаттай морт сынбаңдар, мойын босап,
Болса екен десеңіздер аспан нұрлы.
Араб пен қазақ тілін биік көрген,
Шығыстың өнерін де сүйіп көрген.
Дінің де,әулиелік,ғылымың да
Қазақтың тілінде деп түйіп берген.
Атыңды қалдыр,ұрпақ, адал іспен,
Борандай бұрқ-сарқ етер заман іштен.
Мәшһүрдің ұлы сөзі бойға дарып,
Бүгінде аулақ болдық жаман істен.
«Сөзімді сөйлеп бақтым мен де білген»
Біздерге жыр да өнер, ән-күй – өнер,
Адамды қанатты сөз тәрбиелер.
«Қыздарға қырық үйден тиым бар» деп,
Айтқан ғой аты мәшһүр әулиелер.
Жігітте бақ та болар, сор да болар,
Сол бағың сөз ұқпаса зорға қонар.
Жақсыда жар да болар, мал да болар,
Адамның іздегені жолда болар.
Балалар, жалқау болма, еңбек істе,
Жетесің еңбек қылсаң зор жеңіске.
Жалқаулар жатып ішер елге масыл
Шын бақыт бұйырмайды боркемікке.
Жастарға керек екен өнер-ғылым,
Пайдасы орасан көп берер мұның.
Оқысаң Мәшһүр Жүсіп Көпейұлын,
Береді терең білім, кемел білім.
Айтқан ғой бәрін тізіп бабаларым,
Жүсіпті, Ұлы Абайды сараладым.
Намаздың қасиетін ұғындырған
Қадірін айтып кеткен оразаның.
Өлеңге құмар болдым жөргегімнен,
Қиссаны оқып өстім зор көңілмен.
Базарын дүниенің талай көрдім,
«Сөзімді сөйлеп бақтым мен де білген»
Арман
Ақ арманым ақ гүлімдей солмайтын,
Ақ арманым, мөлдір сусың тоймайтын.
Жібек, маржан, асыл тастан тізілген
Жасылсың ба, қызылсың ба, қандайсың?
Жас жүрегім жалын атып, шарқ ұрып,
Көңілімнен су ішеді бал тұнық.
Мен өмірді сүру үшін тым ғажап
Арман керек, қалай жетем алқынып.
Ақ қанатты бұлттар анау ақ ұлпа,
Олар да әне биік кетті барынша.
Биікке ұшып кеткісі кеп тұрады
Адам деген өткен шағын сағынса.
«Биік болып қалу үшін ғаламда
Үлкен арман керек екен адамға».
Мұхтар аға өлеңінен қуат ап,
Зәу биікке самғап ұшар балаң да.
Бақыт деген...
Бақытты біз неге алыстан іздейміз?
Бақыт деген не екенін білмейміз.
Бақыт деген – туған-туыс, бауырың
Бұл сөздерді құлаққа да ілмейміз.
Асқар таудай әкең болса сол – бақыт,
Мейірімді анаң болса сол – бақыт.
Қиналғанда дәл қасыңнан табылар,
Бауырларың аман болса сол – бақыт.
Алла берген несібең бар, сол – бақыт.
Байтақ елде өмір кештік – зор бақыт.
Жүректегі мейірімді суытпай
Тура жолда болсаң, міне, сол – бақыт.
Ата-әжеңнен бата алсаң, сол – бақыт,
Сүйген құлдың бірі болсаң сол – бақыт.
Парыз еткен бес күн намаз оқысаң,
Жүрегіңде иман болса сол – бақыт.
Әр адамның бақыты бар жалғанда,
Сол бақытты сөндірмейік жанғанда.
Әр сәтіңді бағаласаң, адамзат,
Жетелейді әр бақытың арманға!
Өмір — теңіз, жасыңда күліп ойна
Тасқыны күшті теңіздей өтер уақыт,
Ала-алмассың уақытты енді сатып.
Дүниеде бәрі жалған дейді атамыз
Жақсылық жаса әрдайым – бітпес бақыт.
Бәрі қалар артыңнан бәрі қалар,
Мәнді болған өмірде мағына бар.
Жастық шақтың есесің екі ескегін,
Кешкен теңіз, өзеннің дәмі болар.
Өмір – теңіз, жасыңда күліп ойна
Қалай ғана келмеген бұрын ойға.
Сағынышқа айналар сырғып уақыт
Салиқалы сәттердің сыры қайда?
Уақытты ұрлап ешкім де ала алмайды
Тәуекелге осалдар бара алмайды.
Өткен өмір толғанда өкінішке,
Болашағы жөнінде алаңдайды.
