Биыл Кеңес әскерінің Ауғанстан жерінен шығарылғанына – 36 жыл.

Жезқазған қаласындағы орналасқан Ұлытау облысының Ауғанстан жерінде қаза тапқан интернационалист жауынгерлеріне арналған ескерткіш алдында митинг ұйымдастырылып, гүл шоқтарын қою рәсімі өтті. Оған Ұлытау облысының әкімі Дастан Рыспеков, Ауған соғысының ардагерлері қатысты.

Іс-шара барысында аймақ басшысы Дастан Рыспеков, "Қазақмыс корпорациясы" ЖШС Ауғанстан ардагерлер одағының төрағасы Бағдат Дүйсенов сөз сөйледі.

Ұлытау облысының бас имамы Бейбіт Жансарин боздақтардың рухына арнап, құран бағыштады.

«Ауғанстан – жүректегі жара» демекші, 1989 жылдың 15 ақпаны – талай аналарды перзенттерінен айырған, жауынгерлер қаза тапқан қасіретті де қайғылы «Ауған соғысы» аяқталған күн. Кеңес үкіметі келмеске кетсе де, бұл дата ТМД елдерінде жыл сайын аталып өтеді.

Ауған соғысы – Кеңес одағы тұсындағы тарихтың ең қайғылы беттерінің бірі. 1979 жылы 2 желтоқсанда Кеңес одағының басшылары Ауғанстанға әскер кіргізу туралы шешім қабылдайды. Нәтижесінде сол жылдың 27 желтоқсанында Кеңес әскері Ауғанстан шекарасынан өтіп, 10 жыл бойы соғыс қимылдарын жүргізеді.

Бүгінгі күні облысымызда 160-тан астам ардагер тіркелген. Сол ардагерлеріміз кезінде әскери борышын атқарып жүріп, соғыс барысында ерлікпен, шеберлікпен көзге түсті. Жерлестеріміздің арасынан 7 жауынгеріміз соғыс барысында ерлікпен қаза тапты. Ардагерлеріміз бүгінгі таңда облысымызда жастарға әскери-патриоттық тәрбие беруде.

Деректерге сүйенсек, осы қанқұйлы соғысқа өңірімізден 490 жауынгер шақырылған, оның 100-ден астамы қазір қаламызда тұрады. Олардың ерлігі – ұрпағына үлгі, жастарға өнеге.