​«Жомарттағы» апат: комиссия шешімі күтілуде

Ұлытау облысының «Жомарт» кенішінде апат орын алып, салдарынан 7 кенші опат болды. Олардың арасында 4 машинист, энергетика маманы, электржабдықтаушы мен тау маманы бар. Президент Қасым-Жомарт Тоқаев «Қазақмыс» корпорациясының Ұлытау облысындағы кенішінде тау жынысының опырылып түсуі салдарынан қаза болған жұмысшылардың туған-туыстары мен жақындарына көңіл айту жеделхатын жолдады. Мемлекет басшысы Үкіметке төтенше жағдайдың мән-жайын мұқият тексеру жөнінде міндет жүктеді. Салалық ведомстволар мен өңір әкімдігіне марқұмдардың отбасыларына барлық қажетті көмек көрсету туралы тапсырма берілді.

Премьер-министр Олжас Бектеновтің тапсырмасымен үкіметтік комиссия құрылды. Шахта апатының себебін анықтау, сондай-ақ зардап шеккендерге көмек көрсету жөніндегі арнайы комиссияны Премьер-министрдің орынбасары Қанат Бозымбаев басқаруда. «Қазақмыс» корпорациясының мәліметінше, кеніште табиғи газ жарылған. Апат болған аумақ Жезқазған қаласынан 200 шақырым жерде. «Жомарт» кеніші 2006 жылы қолданысқа берілген, онда мыс сульфиді өндіріледі. Оқиға орнына жеткен құтқарушылар айналасы 4 сағаттың ішінде топырақ астында қалған 6 жұмысшының денесін алып шықты. Араға 1 сағат салып, тағы бір адамның мәйіті табылды. Шахтадағы апатқа қатысты «Тау-кен жұмыстарын немесе құрылыс жұмыстарын жүргізу кезінде қауіпсіздік ережелерін бұзу» бойынша қылмыстық іс қозғалды. Облыстық Полиция департаменті өкілдерінің мәлімдеуінше, қазіргі уақытта барлық қажетті тергеу амалдары жүргізіліп жатыр.

Премьер-министрдің орынбасары Қанат Бозымбаев бастаған Үкіметтік комиссия жағдайды бағамдап, құтқарушылармен тілдесті, жиын өткізді. Қанат Бозымбаев тергеу жұмыстарын жедел әрі тыңғылықты жүргізуді және келешекте мұндай апаттарға жол бермеу үшін барлық қажетті шараларды қолға алу керектігін ескертті. Ұлытау облыстық әкімдігінде вице-премьер «Қазақмыс корпорациясы» ЖШС басшылығымен жиын өткізді. «Қазақмыс» қаза тапқандардың отбасыларына барлық қажетті қаржылық көмек көрсетіп, сондай-ақ, олардың несие қарыздарын өтейді.

«Қаза тапқандардың ғана емес, олардың отбасы мүшелерінің де қарыздары мен несиелерін өтеу қалыпты жағдай. Сіздер отбасылардың жағдайын мұқият саралап, балаларды, оның ішінде кәмелетке толмағандарды оқытуға кететін шығындарды жабуларыңыз керек», — деді Қанат Бозымбаев. Ал, республикалық бюджеттен асыраушысынан айырылу бойынша мемлекеттік жәрдемақы, сақтандыру төлемдері қарастырылған және жерлеу шығындары өтеледі. ҚР Премьер-Министрінің орынбасары Қанат Алдабергенұлы төлемдерді кешіктірмеуді тапсырды. Тиісті тергеулерден кейін шахтада «Қазақмыс корпорациясы» ЖШС-де келісімшарттық міндеттемелер қайта қаралатын болады. «Тергеу оның қауіпті немесе қауіпсіздігін көрсетпейінше, шахтадағы жұмысты қайта бастау туралы ойламаңыз. Жүйе мен тәсілдерді түбегейлі өзгерту қажет, біз мемлекет тарапынан оларды қатайтатын боламыз. Өнеркәсіптік қауіпсіздік комитеті құрылды, біз заңнаманы өзгертеміз. Қазір Парламентте тиісті заң жобасы қаралуда, осы заң жобасы шеңберінде Төтенше жағдайлар министрлігіне қосымша өкілеттіктер берілетін болады. Мұндай жазатайым оқиғалардың алдын алу үшін біз бар күшімізді саламыз. Мемлекет басшысы тергеуді мұқият жүргізуді тапсырды. Бұл құқық қорғау органдарының сараптамалары, өнеркәсіптік қауіпсіздік комитетінің тергеуі, сондай-ақ, сіздің еңбек инспекторларыңыздың тексерулері. Сіздің міндетіңіз – осы төтенше жағдайға кімнің жол бергенін анықтау», — деді Қанат Бозымбаев компания басшылығына.

Айта кететін бір жайт, Ұлытау облысындағы апат болған кеніш сараптамадан кейін бірақ іске қосылады. Үкімет комиссиясының төрағасы Қанат Бозымбаев атқарылуы тиіс жұмысты толық жүйелеп, барлық жауапты органға нақты тапсырма берді. Кеніштің алдағы жұмысы комиссияның шешіміне тікелей байланысты болмақ.

Ақтілек Ақтаңгер.