МӘМС жүйесінің игілігі

Ұлытау облысында алғаш рет МӘМС шеңберінде тізе және жамбас буынын эндопротездеу отасы жасалды.

Енді оқыстан ауыр жарақат алып, сүйегін сындырған жандар немесе кәрілікке байланысты аяғын жаза алмай қалғандар облыс орталығында МӘМС арқылы тегін операцияға жүгіне алады.

Тізе және жамбас буынын эндопротездеу – зақымданған буынды жасандысына айырбастайтын өте күрделі ота. Жасанды буын жоғары сапалы медициналық қорытпадан тұрады. Эндопротездерді пайдалану мерзімі – 20 жыл. Бұл жоғары технологиялық медициналық көмек буыны қатты зақымданған емделушілерге көрсетіледі. Осыған дейін мұндай оталар еліміздің ірі қалаларында жасалатын. Тиісінше кезекті де науқастар ұзақ күтіп қиналатын.

Бұдан кейін ұлытаулықтарға эндопротездеу алысқа бармай-ақ, Жезқазған қаласында әлеуметтік медициналық сақтандыру қорының жеткізуші «Жезқазған медициналық орталығы» ЖШС базасында қолжетімді.

Қаражал қаласының тұрғыны Ләйла Шубаева аяқ басып, жүруден қалғанына 1 ай болыпты. Енді, міне, МӘМС арқылы тегін операция жасатып, ешкімнің көмегінсіз жүре бастады. Ләйла Кеншімқызының ота жасаған жандарға алғысы шексіз. Ол дербес төлеуші, яғни МӘМС жүйесіне жылына 51 мың төлеу арқылы қымбат отаны тегін жасатты. Жалпы, мұндай отаның құны – 2 млн теңгеден асатынын айта кеткен ләзім.

Ал қазақстандықтар МӘМС қаражаты есебінен осы мүмкіндіктерді тегін пайдалануға құқылы.

МӘМС мүмкіндіктерін пайдаланып, біраз уақыт бойы мазалаған аурудан арылғандардың бірі Раушан Төленова. Небәрі аз күннің ішінде жылдар бойы мазалаған тізедегі ауырсынумен қоштасқан Раушан Мұратқызы – бүгінгі таңда зейнеткер. Сөз арасында денсаулықпен сыналған сәтте МӘМС-тің игілігін сезінгенін жасырмады.

Екі күннің ішінде медициналық орталықтың травматолог-ортопедтері 3 жамбас, 3 тізе буынын ауыстырған.

Естеріңізге сала кетейік, Қазақстанда 2020 жылы міндетті әлеуметтік сақтандыру жүйесі іске қосылды. Осылайша медициналық көмек МӘМС және тегін медициналық көмектің кепілдендірілген көлемі аясында көрсетіледі. Сақтандырылған азаматтарға МӘМС пакеті шеңберінде кейбір мамандардың кеңесі, консультативтік-диагностикалық қызметтер, дәрілік заттармен қамтамасыз ету, қымбат оталар мен оңалту курстары, сондай-ақ күндізгі стационар және жоспарлы ем қолжетімді.