«Жұмысшы мамандықтар саябағы» фестивалі

Бүгін «Ұлытау» дене шынықтыру-сауықтыру спорт кешенінде «Жұмысшы мамандықтары» жылы аясында «Жұмысшы мамандықтар саябағы» кәсіпке бағытталған фестивалінің ашылуы өтті.

Президент Қасым-Жомарт Тоқаев 2025 жылды «Жұмысшы мамандықтары жылы» деп жариялады. Осы бағытта, жұмысшы мамандықтардың танымалдылығын арттыру мақсатында республика көлемінде әртүрлі іс-шаралар өткізілу жоспарлануда. Бүгінгі таңда облысымызда да жылдық жоспарға сәйкес жұмыстар басталды.

Соның бір жарқын мысалы, бүгінгі іс-шара да өңірімізде жұмысшы мамандықтарының имиджін ілгерілету, кадрлар даярлау сапасын жақсарту және жұмыс берушілермен ынтымақтастықты кеңейту мақсатында ұйымдастырылды.

Мемлекет басшысының жұмысшы мамандықтар жылы бастамасы аясында қабылданған Үкімет жоспарының жеті бағыты Ұлытау облысының іс-шаралар желісінде түгел қамтылды.

Фестивальдің салтанатты ашылу рәсімінде Ұлытау облысының әкімі Дастан Рыспеков және «Қазақмыс Корпорациясы» ЖШС «Батыс» филиалы кені жерасты учаскесінің үңгушісі, «Қазақстанның еңбек ері» белгісінің иегері Тұрсынбек Макишев сөз сөйледі.

–Сіздер еліміздің болашағысыздар! Бүгінгі фестиваль сіздер үшін мамандық таңдауға бағыт-бағдар беріп, өз болашақтарыңызды айқындауға мүмкіндік сыйлайды. Әркім өзінің сүйікті ісімен айналысып, қоғамға пайдасын тигізсе – бұл нағыз жетістік. Жұмысшы мамандығын таңдау – бұл абыройлы таңдау!-деді облыс әкімі өзінің құттықтау сөзінде.

Өңірдегі еңбек нарығының басым бөлігі – жұмысшы мамандықтар (Техникалық және кәсіптік білім беру ұйымдарында 53 жұмысшы мамандығы (70 біліктілік) бойынша 4631 студент білім алуда. Қазір Ұлытау облысында 15 колледж бар (оның 11-і – мемлекеттік, 4-і – жекеменшік. 64 мамандық және 101 біліктілік бойынша 6309 студент білім алады. 4680 студент мемлекеттік тапсырыс бойынша оқиды.

Қазіргі таңда өңіріміздегі 27 инвестициялық жоба жұмыс жасауда, алайда осы жобалар іске қосылу кезінде кадр мәселесі туындауы мүмкін, осы тарапта «Атамекен» кәсіпкерлер палатасы жергілікті атқарушы органдармен, колледждермен жұмысшы кадрларды дайындау мәселесін переспективалық тұрғыда шешімін табу үшін жұмыстар жасауда.

Айта кетейік, ауқымды шараны Ұлытау облысының әкімдігі мен техникалық және кәсіптік білім беру ұйымдары бірлесіп ұйымдастырды. Осы бірегей алаңда 3 күн бойы студенттер шеберлік сыныптарын, кәсіптік сынақтар мен шеберлік байқауларын ұйымдастырып, дайындық сабақтарын өткізеді. Бұл шаралар оларды нағыз еңбек әлеміне жетелеп, жұмысшы мамандықтарының құндылығын сезіндіруге, олардың бойындағы қабілеттерді ұштауға бағытталады.

20:36
406

«Сарыарқа газеті редакциясы» ЖШС
Қазақстан, Жезқазған қ., Есенберлин 63/3
Телефон: 8 (7102) 20-19-88

Яндекс.Метрика

ТОО «Редакция газеты Сарыарка» © 2020