​Қала әкімінің мерекелік қабылдауы

Жан біткенді жадыратып келетін көктемнің алғашқы аптасы әжелеріміздің, аналарымыздың, қарындастарымыздың төл мерекесімен басталатыны – ғажап үйлесім. Осынау керемет 8 наурыз – Халықаралық әйелдер күні қарсаңында «Байқоңыр» мейрамханасында қала әкімі Қайрат Шайжановтың мерекелік қабылдауы ұйымдастырылды.

Іс-шараға түрлі қызмет салаларында – білім беру мен денсаулық сақтау, спорт пен қорғаныс саласында, Төтенше жағдайлар басқармасында, өндірісте өзін танытқан, еңбегі елеулі болған белсенді аяулы апалар, қыз-келіншектер қатысты.

Шаһар басшысы құттықтау сөзінде нәзік жандылардың қоғамдағы, сондай-ақ ұрпақ тәрбиелеудегі, ұлттық дәстүрлер мен отбасылық құндылықтарды сақтаудағы маңызды рөліне тоқтала кетті.

Марапаттау салтанатында Қазақстан Республикасы Президентінің 2024 жылғы 23 желтоқсандағы №739 Жарлығы бойынша «Күміс алқа» алқасымен Шолпан Айтілеуова, Сәбира Берганаева, Гүлжан Ерденова, Гүлмира Мадханова, Әсел Мұханбетова, Тоғжан Сариева және Гәкку Садирбекова марапатталды.

70 жылдық тарихы бар қаламыздың өткені мен бүгінінің шежіресінде еңбек адамдарының қолтаңбасы жатыр. Қаламыздың бүгінгі тыныс-тіршілігі қуантады. Ілгерілеу байқалады. Осы істің бел ортасында аяулы аналар бен арулар қала әкімінің Құрмет грамотасына ие болды.

Қаламыздың қоғамдық-саяси, әлеуметтік, мәдени өміріне қосқан үлестері үшін нәзік жандылардың бір тобы Жезқазған қаласы әкімінің алғысхатын иеленді.

Ардагер әжелеріміз, апаларымыз және асыл аналарымыз мерекелік шараның төрінен табылды. Олар — кешегі күндердің сын-сынағын бастан кешірген, ел ертеңі үшін дамыл көрмеген, саяси-әлеуметтік саланың жауапты қызметтерінде тер төккен еңбек қаһармандары.

Айта кету керек, қоғамдық даму, саяси-экономикалық, қаржылық, әлеуметтік, мәдени-рухани саланың, құқық қорғау, төтенше жағдайлар жөніндегі сала қызметінің де бейнеті мен зейнеті мол. Осы жауапты қызметтердің бел ортасында жүрген асыл аналар мен қыз-келіншектердің ерен еңбегін ескермей кетуге болмайды.

Мерекелік шара барысында оқу-білім, тәрбие саласында, денсаулық сақтау саласында жемісті еңбек етіп, ел құрметіне бөленіп жүрген сала мамандарына және ардақты зейнеткер аналарға құрмет көрсетілді.

2025 жыл – «Жұмысшы мамандықтар жылы». Бұл – ел байлығын арттыруға айтарлық зор үлесін қосып жатқан жұмысшыларға деген айрықша құрмет. «Қазақмыс Корпорациясы» – ел өндірісінің, Қазақстанның түсті металлургиясының қазыналы орыны. Ал осы салада еңбек етіп жатқан жандардың маңдай тері – нағыз адал еңбектің үлгісі. Іс-шараға қатысып отырған «Қазақмыс Корпорациясы» жауапкершілігі шектеулі серіктестігінің әр қилы буынында еңбек етіп жүрген жұмысшы аналар мен қыз-келіншектердің есімдері аталғанда, оларға құрмет-қошемет көрсетілді.

1986 жылдың ызғарлы желтоқсанында қазақ жігіттері мен ару қыздары ерлік пен қайсарлықтың үлгісін танытты. Сол жылы ұлттық намысты ту еткен жезқазғандық жастардың да үні екпінді естілген болатын. Аналар мерекесіне арналған шараның төріне сол жезқазғандық желтоқсаншы арулар жайғасты.

Мерекелік кеш тамаша концерттік бағдарламамен жалғасын тапты. Жиын қала әкімінің қонақтарға гүл мен естелік сыйлықтарды арнайы табыстауымен өз мәресіне жетті.