​Ұлытау облысы әкімінің салтанатты қабылдауы

Облыс әкімдігінің ғимаратында 8 наурыз – Халықаралық әйелдер күні қарсаңында аймақ басшысы Дастан Рыспековтің салтанатты қабылдауы ұйымдастырылды.

Мерекелік қабылдауға облысымыздың түкпір-түкпірінен келген, өңіріміздің өркендеуі, азаматтарымыздың сапалы өмір сүруі үшін талай жыл аянбай еңбек етіп, маңдай тер, ерен еңбегі, өз ісіне деген сүйіспеншілігі мен адалдығының арқасында биіктерді бағындырған әйелдер қауымы қатысты.

Облыс әкімі құттықтау сөзінде Ұлытау облысы мен еліміздің дамуына өз үлестерін қосқан нәзік те қайсар әйелдер қауымына жүрекжарды лебізін арнады.

-Әйелдер қауымы әрқашан әрбір салада үздіксіз еңбек етіп, өз кәсібінде жоғары нәтижелерге қол жеткізіп келеді. Бұл экономикалық және әлеуметтік дамуына үлкен үлес қосады. Сіздердің қайраттылықтарыңыз бен жылулықтарыңыз – Ұлытау облысының және еліміздің дамуына ұдайы серпін береді,-деді Дастан Адайұлы құттықтау сөзін жалғап. 

Жаңадан ашылған Ұлытау облысының орталығы мәртебесіне ие болған Жезқазғанның осы 71 жылдық тарихында бел талдырып, маңдай терін төккен әже-апаларымыздың тарау-тарау жолдары жатыр. Олар – әр сала бойынша қала тұрмысының дамуына үлес қосқан аңыз ардагерлер.

Салтанатты іс-шарада ардагер педагог Қазима Шонова, журналистика саласының ардагері Несібелді Битенова, «Kazakhmys Distribution» ЖШС Жылуэнергетика кәсіпорнының №1 жылу станциясының сорғы қондырғыларының машинисі Зүбайра Отыншиева, Жәйрем тау-кен байыту комбинатының байыту комбинаты өнімінің бақылаушысы Наталья Савина құттықтау сөз сөйлеп, жылы лебіздерін білдірді және әкімдік қызметкерлеріне алғыс айтты.

Шара барысында Т.Қалмағанбетов атындағы облыстық филармония ұжымы жиналғандарға мерекелік бағдарлама ұсынды.Облыс әкімдігіндегі мерекелік жиын облыс әкімінің облысымыздың көркеюіне, әлеуметтік-экономикалық дамуына өзіндік үлес қосып жүрген нәзік жандылардың әрқайсысына 100 000 теңгенің сертификатын, гүл мен құттықтау хат табыстауымен өз мәресіне жетті.

Не десек те, дүниенің тірегі – әйел. Махаббаттың асыл нұры – әйел. Өмір деген алтын сарай есігінің күміс кілті – әйел махаббаты, ана махаббаты. Қорғаушымыз да, қолдаушымыз да болған аналар, әйелдер қауымы мәңгі аман болсын, мәңгі жасасын!