Тағдырлар 2

      Қаламыздағы «Kinoplexx Zhezkazgan» кинотеатрында «Тағдырлар 2» атты әлеуметтік фильмдер циклінің тұсаукесері көрсетілді.   

Ең алдымен ортаға фильм продюсері Еркебұлан Молдашов шығып, сөз сөйлеп, барша қолдау танытқан жандарға алғысын жеткізді. 

Кейін сөз кезегін алған Жезқазған қалалық мәслихатының төрағасы Раушан Қапарова, Жезқазған қалалық ішкі саясат бөлімінің басшысы Қаламқас Абдуалиева және Жезқазған қалалық мәслихатының депутаты Роза Рымбаева шығармашылық ұжымға жүрекжарды лебіздерін жеткізіп, жұмыстарына ақ жол тіледі.

Кинотеатрға жиналған көрермендер «Баланың жылуы», «Өзге өмір», «Жаман ой», «Соңғы тілек» және «Отбасы шекарасы» сынды қалың көпшілікке ой саларлық барлығы 5 фильмдер циклін тамашалады.

Айта кетейік, фильмдердің барлығын дерлік Жезқазған қаласы әкімдігінің тапсырысымен «Er-Nar Media» киностудиясы түсіріп шыққан. «Er-Nar Media» киностудиясы осы уақытта дейін 1 жылдан астам уақыт ішінде 30 шақты осы сынды фильмдерді түсіріп үлгерген.

Жалпы тақырыбы «Тағдырлар 2» деп аталатын фильмдер қазіргі қоғамдағы өзекті проблемаларды, адамдардың бір-бірлеріне қарым-қатынасты ашып көрсеткен. Бүгінгі таңда қыздар мен келіншектердің түрлі коучтардың «ақыл-кеңестерін» тыңдаймын деп опық жеп қалатыны да ғажап суреттелген. Талай отбасының шырқын бұзған проблема – жас отбасының ортасына түсу жөніндегі фильмі де керемет ой саларлық. 

— Фильмде жоғары жақтағы емес, қоғамның ішіндегі негізгі проблемаларды көрсетіп, түсіндіруге тырыстық. Әлеуметтік желілермен тәрбиеленіп жатқан жастарға азғантай болса да ой саларлық дүниелер жасап шығаруға тырыстық. Талай жандардың жақсы жаққа өзгеруіне септігін тигізер деген ниетте бізге бұл жобаны үлкен сенімділікпен тапсырған Жезқазған қаласының әкімдігіне ризашылығымыз шексіз. Біз бұл фильмдерді өзіміздің YouTube каналымызда ай сайын бір-бірден шығарып тұратын боламыз,-дейді фильм режиссері Шапағат Орынбаев.

Жезқазған қалалық ішкі саясат бөлімінің басшысы Қаламқас Абдуалиеваның айтуынша, қоғамдағы өзекті мәселелерге жастар ғана емес, аға буын өкілдері де назар аударулары үшін, осындай дүниелердің керектігі білініп, бұл жоба жақында қолға алынған.

Бұл шара негізінен «Er-Nar Media» киностудиясы атынан фильмге түскен және қолдау көрсеткен жандарға алғыс айту мақсатында және қала тұрғындарына жарнамалау мақсатында ұйымдастырылды. Кәсіби маман Шапағат Орынбаев бастаған топ жоғары дәрежеде түсіріп шыққан фильмдер көптің көңілінен шықты.