​Сыр сақтаушы сандық

Ұлыстың ұлы күні – Наурыз мерекесі қарсаңында жалпыұлттық Наурызнама онкүндігі аясында 17 наурыз – Мәдениет және ұлттық салт-дәстүр күніне орай Ұлытау облысының мәдениет, тілдерді дамыту және архив ісі басқармасының қолдауымен және Ұлытау облысының тарихи-археологиялық музейінің ұйымдастыруымен « Сыр сақтаушы сандық » атты қазақ қолөнерінің асқан шеберлігі мен талғампаздығын насихаттайтын этнографиялық көрме өтті.

Негізгі мақсат – қала тұрғындары мен қонақтарын сандықтардың кезіндегі Жезқазған облысының Ағадыр, Шет, Ақтоғай, Ұлытау, Жезді және Жаңаарқа аудандарынан этнографиялық бағыттағы экспедиция нәтижесінде 1981 жылдан бастап жинақтала бастаған тарихымен таныстыру және музей қорындағы 30 сақтау бірлігін құрайтын әр ғасырға тиесілі, қолданылу формасы әртүрлі сандықтар коллекциясының жасалуына, көлеміне, тұрмыста пайдалану қажеттілігіне қарай бөлінетін асыл мұрасын дәріптеп, насихаттау.

Этнографиялық көрмені қала қонақтары мен тұрғындары, мәдениет саласы және өзге де мекеме қызметкерлері, өңіріміздің өзге де музейлерінің басшылары қызықтап, салт-дәстүр бен этнографияның сан қилы сырларына бір сусындап қалды. Музей қызметкерлері іс-шара барысында дәстүрлі ұлттық құндылықтарымызды дәріптеп қана қоймай, олардың жасалу жолдары мен өзіндік ерекшеліктерін қалың көрерменге тамаша жеткізе білді.

Облыстық, қалалық конкурстардың жеңімпазы «Ақ әжелер» ансамблінің орындауындағы «Беу, айдай» атты халық әнімен шымылдығын түрген іс-шараның алғы сөзін Ұлытау облысының мәдениет, тілдерді дамыту және архив ісі басқармасының басшысы Мағжан Табылдин алып, одан кейін «Қазақтың Кетбұқасы» қоғамдық бірлестігінің төрағасы Төлеген Бүкіров және Қазақстан Жазушылар одағы Ұлытау облыстық филиалының директоры Батырбек Мырзабеков құттықтауларын білдірді.

«Ән көңілдің ажары» — демекші, өз әуендерімен тәнті еткен халықаралық, республикалық байқаулардың жеңімпазы, Юлия Белохвостованың жетекшілігіндегі «Шалқыма» би ансамблінің орындауындағы «Наурыз», «Жаңа ғасыр» әндері, Т.Қалмағанбетов атындағы Ұлытау облыстық филармониясының әншісі, Ә.Қашаубаев атындағы республикалық әншілер конкурсының лауреаты Ардақ Мұқышевтың орындауындағы Мұқағали Мақатаевтың сөзіне жазылған, Тұрсынғазы Рахимовтың «Қазағым-ай» әні көрермен көңілін бір марқайтып тастады.

Іс-шара барысында музей қызметкерлері қазақ халқының тұрмысында киелі, аса қасиетті саналатын қара қазан, шаңырақ және бесік секілді бұйымдар жайлы сөз қозғап, жоғары деңгейде өткізіліп жатқан іс-шараның басты құндылығы сандық жайлы терең сипаттағы жан-жақты мәліметтерімен, құпияларымен бөлісіп, қалың көрерменнің ұлттық құндылықтарға деген қызығушылығын оята білді.

Іс-шараға арнайы шақырылған өңіріміздің ең жас қолөнер шебері, жас кәсіпкер, 11-сыныптың оқушысы, Сәтбаев қаласы әкімі грантының иегері, қазіргі таңда лазерлік құрылғымен заманауи түрде ұлттық құндылықтарды жасап, насихаттап жүрген Ескендір Ардақұлы өз қолынан шыққан сандығын музей қорына тапсырып, ізгі тілегін білдірді.

Шара барысында «Сандық жайлы не білесіз?» ойыны жалғасын тауып, викториналық сұрақтардың дұрыс жауаптарын тапқандарға сыйлықтар таратылды.

Көрме лентасы көпшілік көрермен үшін салтанатты түрде қиылған соң, музейдің экскурсия-бұқаралық бөлімінің басшысы Эльвира Мұхамедина сиқырлы сыр сандықтар жайлы жан-жақты сыр ақтарып, жиналғандарды этнографиялық көрмемен таныстырды.