​Ысырапшылдық тоқтау қажет

«AMANAT» партиясының Ұлытау облыстық филиалының мәжіліс залында жергілікті ақсақалдар кеңесі мен ҚМДБ Ұлытау облыстық өкілдігінің ұйымдастыруымен «Ас беру мен зират көтерудегі ысырапшылдықтың алдын алу» тақырыбында форум өтті.

Жезқазған қаласы ардагерлер кеңесінің төрағасы Мұрат Қазамбаев жиынды ашып, жүргізіп отырды.

Ең алдымен сөз кезегін алған Ұлытау облысының бас имамы Бейбіт Жансарин Ислам шариғаты бойынша ысырапшылдықтың зардабы жөнінде сөз тарқатты. Ол: «Қандай жағдайда да ысырапшылдыққа жол беруге болмайды»,-деді.

Форумда діни рәсімдерді, атап айтқанда жерлеу, жаназа, марқұмның қайтқан күнгі қонақ асын беру кезіндегі ысырапшылдық мәселесі қаузалды. Бұған кейінгі жылдары күмбезі көк тіреген зираттар салу мәселесі де қосылуда. Соңғы уақытта қоғамда жерлеу рәсімдерін өткізу кезінде қайғыдан қан жұтып отырған отбасы көп шығынға ұшырайтыны жиі айтылып жүр. Әсіресе, ас беруге жұмсалатын шығын өте көп. Бір сөзбен айтқанда, кісі қайтқан үй бірнеше мәрте шығындалып ас беруге мәжбүр. Бұл дәстүрге де, ислам қағидаларына да қайшы. Себебі қайтқан кісінің жамбасы жерге тимей, құран бағышталмайды. Сондықтан ысырапшылдыққа жол бермеу, ұлттық дәстүр мен ислам қағидаларын сақтауға қатысты осы және өзге де мәселелер форум алаңында талқыға салынды.

Сонымен қатар ардагерлер кеңесінің бірқатар мүшелері көтерілген мәселе бойынша өз ойларын айтты. Басқа да қоғам белсенділері, ел ақсақалдары келелі ой, кесімді көзқарас, ұтқыр ұсыныстарын ортаға салды.

Форум соңында Мұрат Сүтенұлы қабылданған шешімді жиынға қатысушылар назарына ұсынды. Шешімде ас мәзірін бірізділікке салу (бауырсақ, нан, қант, кәмпит-печенье, су, шай, ыстық тамақ) нақтыланды.

Іс-шараны ұйымдастырушылар алдағы уақытта қаладағы мейрамхана иелерімен де кездесу өткізіп, өз ұсыныстарын жеткізбек. Негізгі мақсат – ырысыңды шашатын ысырапшылдықты тоқтату!