​Сын айтылды, қорытынды қайда?!

            Қордаланған бірқатар мәселелерді қамтыған кезекті аппарат мәжілісі өтті. Ұлытау облысының әкімі Дастан Рыспеков төрағалық еткен жиында 2025 жылғы қаңтар-ақпан айындағы бюджеттің атқарылу қорытындылары, мемлекеттік сатып алулар және үкіметтік емес ұйымдарды қолдау және дамыту мәселелері қаралды.

Алғашқы мәселе бойынша қаржы басқармасының басшысы Жеңіс Қиянбеков баяндады. Ақпаратпен танысқан облыс әкімі қаражатты өз мәнінде игермеген бірқатар саланы сынға алып, барлық бюджет әкімшілеріне олқылықтың орнын толтыруды тапсырды. Одан бөлек, қаржы басқармасына бюджеттің кіріс бөлігі бойынша жоспарды қайта қарауды қаперге салды.

Аппарат мәжілісі барысында облыс әкімі берілген тапсырманың орындалысы көңіл көншітпейтінін алға тартып, жұмысты жоспарлау деңгейін де сынға алды. Тәртіптік жаза берілсе де, оң қорытынды байқалмағанын айтқан әкім Дастан Адайұлы бюджет әкімшілеріне І тоқсан соңына дейін уақыт беріп, халыққа қолайлы жағдай жасау мақсатында қолға алынатын жобалар бюджетінің игерілуі мен мемлекеттік сатып алудың уақытылы өтуі мәселесі қайта қаралатынын және соған байланысты тиісті шешім шығарылатынын қатаң ескертті. Сондай-ақ, биыл құрылыс, абаттандыру, көгалдандыру және жолдарды жөндеу жұмыстарына ерекше көңіл бөлінетінін, мемлекеттік сатып алу жоспарынан кешігу жұмыстарын болдырмау қажеттігін және қосты.

Жиында облыс әкімі өңірімізде волонтерлік қозғалысты күшейтуді, бұл ретте тың бастамаларды қолға алу, үкіметтік емес ұйымдардың жұмысын белсенді жүзеге асыру, оларды жетілдіру қажеттігін атап өтті. Аппарат мәжілісінде облыстың тыныс-тірлігіне қатысты басқа да мәселелер қаралып, жауапты мамандарға нақты тапсырма берілді.

Мерей Рүстем.