​Әзірлік әлеуетін әлсіретуге болмайды

      Ұлытау облысының әкімі Дастан Рыспеков Жаңаарқа ауданына жұмыс сапармен барды. Онда Сарысу, Манақа өзендерінің бойында орналасқан ауылдар мен елдімекендерді аралап, су тасқынының алдын алуға қатысты бірқатар тапсырма берді.

     Өңір басшысы Қызылжар кенті, Түгіскен ауылы, Жомарт станциясы, №189 разъезд, Манадыр және Атасу станциялары, Ақтүбек, Байдалы би ауылдарына арнайы барып, қызыл су шаю қаупі бар мекендерді нығайтуды, қосымша арнайы техникалар тартуды, азық-түлікпен, жанар-жағармаймен қамтамасыз етуді тапсырып, құтқару, медициналық көмек көрсету турасында нақты міндеттер жүктеді. Сонымен қатар, тиісті басқармаларға және жергілікті әкімдіктерге Қызылжар кентіндегі көпір құрылысының жұмыстарын ширату, «Жалын» компаниясының мүмкіндігін пайдаланып суағар санын арттыру, халыққа ақпараттандыру-түсіндірме жұмыстарын жүйелі түрде жүргізуге қатысты тапсырма берді.

      Жұмыс сапары барысында облыс әкімі Дастан Адайұлы Манадыр станциясындағы мектеп құрылысының қарқынын да бақылады. 80 орындық білім ошағының жұмысын кестеге сай жүргізу, қазжетті материалдармен толық әрі мерзімінде қамтамасыз етуді жауапты мамандарға тапсырды.

Мерей Рүстем.