13 аудиторлық іс-шара өткізілді

Ұлытау облысы бойынша тексеру комиссиясының төрағасы Айдос Садықов БАҚ өкілдерімен брифинг өткізді.

Брифинг барысында Ұлытау облысы бойынша тексеру комиссиясының 2024 жылға арналған аудиторлық қызметінің қорытындылары туралы ақпарат берілді. 

– «Мемлекеттік аудит және қаржылық бақылау туралы» Қазақстан Республикасы Заңына сәйкес тексеру комиссиясының негізгі миссиясы – әкімшілік аумақтық бірлік шегінде қаржы тәртібін нығайту және экономикалық тұрақтылықты қамтамасыз ету мақсатында жергілікті бюджет қаражатын басқарудың және пайдаланудың тиімділігін арттыру болып табылады,-деді Айдос Қабдуахитұлы өз сөзінде. 

Әрі қарай баяндамадағы мәліметтерге тоқтала кетсек:

2024 жылы Ұлытау облысы бойынша тексеру комиссиясы мемлекеттік аудит объектілерінің бекітілген тізбесіне сәйкес 37 мемлекеттік аудит объектілеріне 13 аудиторлық іс-шара өткізген.

Жалпы 59 360,7 млн.теңге сомасына бұзушылықтар анықталды, оның ішінде:

— қаржылық бұзушылықтар – 21 651,0 млн.теңге;

— тиімсіз пайдаланылған бюджет қаражаты мен мемлекет активтері – 4 870,7 млн.теңге; 

— бюджет қаражаты мен мемлекет активтерін тиімсіз жоспарлау – 18 111,6 млн.теңгені құрады. 

Атап айтқанда: 

«Ұлытау облысы бойынша қаржы басқармасы» ММ бойынша – қаржылық бұзушылықтар – 13 932,1 млн.теңгені; «Ұлытау облысының мәдениет, тілдерді дамыту және архив ісі басқармасы» ММ бойынша – қаржылық бұзушылықтар 1 372,9 млн.теңге, тиімсіз пайдаланылған бюджет қаражаты мен мемлекет активтері – 990,2 млн.теңге және бюджет қаражаты мен мемлекет активтерін тиімсіз пайдалану – 1 296,1 млн.теңге; «Ұлытау облысының білім басқармасы» ММ бойынша – қаржылық бұзушылықтар – 1 105,3 млн.теңгеге; бюджет қаражаты мен мемлекет активтерін тиімсіз пайдалану – 14 739,0 млн.теңгеге анықталды. Тиімсіз пайдаланылған бюджет қаражаты мен мемлекет активтері бойынша «Ұлытау ауданының құрылыс бөлімі» ММ – 2 728,7 млн. теңгеге және «Ұлытау облысының ауыл шаруашылығы және жер қатынастары басқармасы» ММ – 624,5 млн. теңгеге анықталса, «Ұлытау ауданының қаржы және экономика бөлімі» ММ-сі – 3 763,2 млн.теңгеге және «Ұлытау облысының полиция департаменті» ММ – 694,6 млн.теңгеге бюджет қаражаты мен мемлекет активтерін тиімсіз жоспарлаған. 

Сонымен қатар, қаржылық есептілік аудитін жүргізу кезінде белгіленген қаржылық есептіліктің бұрмалануы 14 727,5 млн.теңгені құрады. 

Қалпына келтіруге және өтеуге жататын бұзушылықтардың жалпы сомасы – 24 195,6 млн.теңге, оның ішінде: өтелгені – 623,1 млн.теңге, қалпына келтірілгені – 10 813,5 млн.теңге. Орындау мерзімі аяқталмауына байланысты өтелмеген және қалпына келтірілмеген қаражат сомасы 12 758,9 млн.теңгені құрады (оның ішінде: өтелмегені – 1 010,7 млн.теңге; қалпына келтірілмегені – 11 748,2 млн.теңге).

Салық түсімдері бойынша аудит барысында жергілікті бюджетке 381,3 млн.теңге көлемінде түсімдер түсті, оның ішінде корпоративтік табыс салығынан – 293,4 млн.теңге, жеке табыс салығынан – 56,4 млн.теңге, әлеуметтік салықтан – 31,2 млн.теңге. 

732 процедуралық бұзушылық анықталды. Аудиторлық іс-шаралардың қорытындысы бойынша 9 тұлға тәртіптік жауапкершілікке, 31 тұлға әкімшілік  жауапкершілікке тартылды, ал айыппұл сомасы 13,3 млн.теңгені құрады. 

Сонымен қатар, бюджеттік бағдарламалардың іске асырылуы туралы есептері шындыққа сәйкес келмейтіндігі, осылайша ұсынылған есепке сәйкес тікелей оң нәтижеге қол жеткізу мүмкіндігінің болмауы, кейбір басқарламаларда пайдалану мерзімінің өтуіне байланысты, баланстан шығарылмаған көліктердің бары да анықталды.

Тексеру комиссиясы тарапынан, аудит қорытындысы бойынша Қазақстан Республикасының заңнамалары аясында тиісті ұсынымдар мен нұсқамалар берілді. Өз кезегінде бүгінгі күнге дейін бекітілген мерзімге сәйкес ұсынымдар мен нұсқамаларды жеткіліксіз орындамай отырған басқармалардың бар екендігін атап өткен жөн.

Айта кетейік, тексеру комиссиясы кадр тапшылығына және сертификатталған мамандардың жетіспеушілігіне қарамастан 2024 жылға арналған мемлекеттік аудит объектілерінің тізбесінде көзделген барлық аудиторлық іс-шараларды толық көлемде орындаған.

Брифингке жергілікті «Жезказганский вестник» және «Saryarqa» газеттерінің тілшілері қатысып, тақырып аясында сауалдарын жолдады.