Қоғамдық-саяси реформаларға Ұлттық құрылтайдың оң ықпалы

     Өр Көкше алабында, қасиетті Бурабай төрінде  қоғамдағы ең өзекті деген мәселелер талқыланды. Қазақстан Республикасының Президенті Қасым-Жомарт Кемелұлы Тоқаев арнайы қатысқан IV Ұлттық құрылтай отырысында көтерілген мәселелер болашақтың бағыт-бағдарын айқындап берді. 

    Ұлттық құрылтайдың IV отырысы аясында еліміздің әлеуметтік-экономикасын алға жылжытатын, әсіресе, ұлттық құндылықтарымыз мәселелері тілге тиек болды. Мемлекет басшысы бастап, алқалы жиынға қатысушы делегаттар мен баяндамашылар қостап, жүйелі сөз бен салмақты ойлардың тізгіні ағытылды. Ұлттық құрылтайда көтерілген мәселелер үнемі ел назарынан тыс қалмаған олқылықтар мен сол кемшілікті түзету жолы айтылып, осының бәрі заң аясында шешімін табу керек деген тоқтамға келді. Жер жүзіндегі  әр ұлттың өзінің менталитеті бар. Біздің ұлтымыздың ең асыл қасиеті ар мен ұятты бірінші кезекке қойып, ұлы Абай бабамыз айтқандай әдептен озбағанбыз. Ұлттық құрылтай мүшесі, жерлесіміз, атымтай-жомарт азаматымыз Бекзат Алтынбек көтерген кемшіліктер дер кезінде, өте орынды айтылған нағыз елге жанашырлық ой. Бүгінгі көп асабалар қазақтың той-думанын пысық қыламын деп, пұшық қылып жүргендері жасырын емес. Көріп те жүрміз, естіп те жүрміз. Жалпы тойға келетін халық өте көп, әрі жиі келетіні хақ. Сол халық тойдан өнеге алып, рухани байып қайту керек. Ал бізде ше? Тойды тізгіндеген асабасымақ аузына келгенді айтып, келген мейманды, жұртты келемеждеп, басқасын айтпағанда, өзінің ата-анасынан үш-төрт мүшел үлкен ақ жаулықты үлкен кісілерге бейәдеп әзілдер айтуы үлкенді сыйламағандығы. Тойдың сәні асаба қазақтың ата-салтын сақтай отырып, орамды ой мен ұтымды сөз айтып, сайқымазақтыққа көп жол бермеу керек деп есептеймін. Ел алдына шыққан соң өте ұстамды, салмақты сөз саптап, орынды әзіл айтып, ал жұртты күлкіге қарық қылам деп, өзі ұятқа қалмауы керек. Күлдірем деп, бүлдіріп алмауы қажет. 

      Ойымды қортындылай келе Ұлттық құрылтайда қызу талқыланып, халқымыздың рухани-мәдени байлығын нығайтатын мәселелер шешімін тауып, жемісін берсін.

Ізтөлеу ТҮСІПОВ,

Жезқазған қаласының Құрметті азаматы.