​Жаңғырту жұмыстары жүргізіледі

Ұлытау облысында бүгінгі таңда Ұлттық статистика бюросының ақпаратына сәйкес 6 сауда базары тіркелген. Оның екеуі, атап айтқанда, Жезқазған қаласында орналасқан «Мерей» және «Нарық» базарларына Қазақстан Республикасы Премьер-Министрі орынбасарының – Сауда және интеграция министрінің м.а. С.М.Жұманғариннің 30.03.2023 жылғы бекітілген «Сауда базарларын жаңғырту жөніндегі» жол картасы аясында жаңғырту жұмыстары жүргізіліп, ағымдағы жылдың аяғына дейін құрылыс жұмыстары аяқталуы тиіс.

Осыған байланысты, Ұлытау облысы бойынша Сауда және тұтынушылардың құқығын қорғау департаменті «Атамекен» ҰКП ғимаратында сауда базарларына қойылатын талаптарды түсіндіру мақсатында дөңгелек үстел ұйымдастырды. Жиынға жауапты департаменттер, басқармалар, мекеме, ұйым өкілдері мен базар иелері қатысты.

Жиынды Департамент басшысының орынбасары Жасұлан Дәулетбаев ашып, сауда базарларына қойылатын талаптарға тоқталды.

• –Бүгінгі таңда сауда базарларын жаңғырту жол картасына сәйкес Ұлытау облысы бойынша сауда және тұтынушылардың құқықтарын қорғау департаментімен біршама жұмыстар атқарылуда. Бүгін осы кәсіпкерлер палатасындағы жиынға облыс бойынша базар иелерін шақырып, сауда базарларына қойылатын талаптарды түсіндірдік. «Мерей» мен «Нарық» базарларын жаңғырту жұмыстары сәуір айында басталып, жылдың аяғында аяқталмақ,-деді Жасұлан Дәулетбаев.

Қатысушылар сатылатын тауарлардың сапасына, олардың сақталуына аса мән беріп, тұтынушы құқықтарының бұзылмауы үшін барлық жағдай жасалуын қадағалау қажет деп сауда иелеріне ескертті. Ұлытау облысы бойынша Сауда және тұтынушылардың құқығын қорғау департаментінің қызметкері базарларға қойылатын регламенттер мен тұтынушы бұрышын орналастыру тәртібін түсіндірді.

Қазіргі таңда базарлардың көбісі тиісті талаптарға сай емес. Сауда-саттық үшін қолайлы емес, саудагерлер үшін жайсыз. Осы себепті тауар мен көрсетілетін қызмет сапасы көңіл көншітпейді. Енді жол картасына сәйкес осы жылдың соңына дейін еліміздегі барлық сауда нүктелері қаланың архитектурасына, санитарлық және өртке қарсы талаптарға сай болуы керек. Сауда туралы заңнамаға сәйкес, сауда орындары онлайн төлемдерді қабылдау құрылғыларымен жабдықталуы тиіс. Сондай-ақ автотұрақ болуы шарт. Жол картасы аясында 9-орамда орналасқан «Сарыарқа» автобазары 2024 жылы жаңғыртудан өтті. «Сарыарқа» автобазары жол картасына сәйкес міндеттелген жаңғырту жұмыстарын жүргізіп, экономикалық қызмет түрлері жалпы жіктеуіші, яғни қызмет түрін және нысаналы мақсатын ауыстырып, сауда базарларының тізбесінен шығарылды.

Сонымен қатар жиында кәсіпкерлерге мемлекеттік қолдау бағдарламалары туралы ақпарат берілді. Қаржыландыру қажет болған жағдайда кәсіпкерлер қалай әрекет ету керектігі кеңінен түсіндірілді. Өз мәселелерін алға тартқан базар иелеріне сала мамандары жан-жақты қолдауға дайын екендіктерін жеткізді.

Айта кетейік, 2023-2025 жылдарға арналған «Сауда базарларын жаңғырту жөніндегі» жол картасы аясында биыл Қазақстанда 100 сауда нүктесін жаңғырту жоспарланған. Елімізде бойынша базарларды модернизациялау 2025 жылдың соңына дейін аяқталуы керек. Ал 2026 жылдан бастап сауда заңнамасында белгіленген заманауи форматқа сай келмейтін базар иелері әкімшілік жауапкершілікке тартылады.