​Қоғам дамуының негізі – еңбек

     Ел экономикасының тұрақты дамуы мен халықтың әл-ауқатының артуы – жұмысшы мамандық иелерінің тынымсыз еңбегінің нәтижесі. Осыны ескере отырып, Қазақстан Республикасында 2025 жыл «Жұмысшы мамандықтар жылы» деп жарияланды. Бұл шешім – елдегі еңбек адамына деген құрметтің айғағы.

Бүгінгі таңда дәнекерлеуші, құрылысшы, электрик, механик, ауыл шаруашылығы қызметкері сынды мамандықтар қоғам үшін аса маңызды. Заман талабына сай, бұл кәсіп иелері тек физикалық еңбекке емес, сонымен қатар технологияны жетік меңгеруге, кәсіби білім мен дағдыға ие болуға тиіс. Сондықтан жұмысшы мамандықтарын игеру — болашаққа жасалған сенімді қадам.

Өкінішке қарай, соңғы жылдары көпшілік арасында жұмысшы мамандығына деген қызығушылық төмендеп, оның орнына кеңсе қызметтері мен «ақ жағалылар» танымал бола бастады. Алайда шын мәнінде кез келген елдің тірегі – қарапайым еңбек адамдары. Оларсыз зауыт та, құрылыс та, ауыл шаруашылығы да жұмыс істемейді. Ендеше, мұндай мамандықтарды дәріптеу — қоғамның басты міндеттерінің бірі.

2025 жылдың «Жұмысшы мамандықтар жылы» деп жариялануы – осы олқылықтың орнын толтырып, жастарды кәсіптік-техникалық білімге баулуға арналған үлкен мүмкіндік. Бұл – жас буынға бағыт-бағдар беру, еңбекке деген құрметті ояту, еліміздің өндірістік әлеуетін арттыруға жол ашатын маңызды бастама.

Қорытындылай келе, еңбек – ұлттың қуаты. Жұмысшы мамандықтарын таңдау – бұл тек болашаққа сенімді қадам ғана емес, сонымен бірге ел дамуына қосылған зор үлес. Әрбір жас буын осыны түсініп, еңбек адамына деген сый-құрметті жүрегіне сіңіре білсе, еліміздің болашағы жарқын болары сөзсіз.