Жезқазған қаласында жаңа көпқабатты тұрғын үйдің құрылысы басталды

    Жезқазған қаласының Батыс тұрғын үй ауданында, нақтырақ айтқанда Алашахан даңғылы 34С мекенжайында жаңа көпқабатты несиелік тұрғын үйдің құрылысы басталды. Бұл жоба мемлекеттік бюджет қаражаты есебінен жүзеге асырылуда. Тапсырыс беруші – «Жезқазған қаласының құрылыс бөлімі» мемлекеттік мекемесі, ал құрылыс жұмыстарын атқарып жатқан мердігер ұйым – «Астана Көктем-С» жауапкершілігі шектеулі серіктестігі.

    Жоба аясында әртүрлі қабаттылығы бар (4, 5 және 6 қабатты) үш тұрғын үй салынады. Барлығы 90 пәтер қарастырылған:

1 бөлмелі пәтер – 30 дана

2 бөлмелі пәтер – 30 дана

3 бөлмелі пәтер – 30 дана

   Тұрғын үй кешенінің жалпы ауданы – 8,8 мың шаршы метрді құрайды, оның ішінде пәтерлердің жалпы ауданы – 5,4 мың шаршы метр.

   Құрылыстың басталу уақыты – 2024 жылдың тамыз айы. Жоспарға сай, жоба уақытылы аяқталып, тұрғындарға пайдалануға берілуі тиіс.

    Жаңа пәтерлердің 1 шаршы метрінің құны – 273 000 теңге. Бұл тұрғын үйге мұқтаж азаматтар үшін қолжетімді баға саналады. Тұрғындар пәтерлерді «Отбасы банкі» арқылы жеңілдетілген пайыздық мөлшерлемемен рәсімдей алады.

Бұл жоба – Жезқазған қаласындағы тұрғын үймен қамтамасыз ету мәселесін шешуге бағытталған маңызды әлеуметтік бастамалардың бірі. Әсіресе жас отбасылар, әлеуметтік осал топтар және үй кезегінде тұрған азаматтар үшін үлкен мүмкіндік болмақ.