​Ұлытау облысының тұрғындарына варикозды лазерлік емдеу енді тегін қолжетімді

Заманауи лазерлік технология арқасында варикозды ауыртпалықсыз және ауруханаға жатқызусыз емдеуге болады – енді бұл мүмкіндік Ұлытау өңірінің тұрғындарына да берілді.

Не болды

2024 жылы Ұлытау облысында Тамырлы хирургия орталығы ашылды. Онда жыл соңына дейін варикозбен ауыратын 121 адамды емдеу жоспарланып отыр. Барлық процедуралар міндетті әлеуметтік медициналық сақтандыру (МӘМС) аясында тегін жүргізіледі, ал жобаға 30 млн теңгеден астам қаржы бөлінді.

Варикоз дегеніміз не?

Көк тамырлардың варикозды кеңеюі – тек косметикалық мәселе емес, өмір сапасын төмендететін ауыр созылмалы ауру. Ол тамыр қабырғалары әлсіреп, веналық қақпақшалар дұрыс жұмыс істемей қалғанда дамиды. Нәтижесінде қан айналымы бұзылып, аяқта ісіну, ауырсыну, құрысулар пайда болады.

Аурудың негізгі себептері – тұқым қуалаушылық, аз қозғалысты өмір салты, ұзақ уақыт отыру немесе тұру, артық салмақ, жүктілік және тығыз немесе биік өкшелі аяқ киім кию. Варикоз көбіне сатушылар, мұғалімдер, дәрігерлер мен жүргізушілер сияқты аяғымен көп жүретін немесе ұзақ отыратын адамдарда кездеседі.

Емдеудің жаңа әдісі

Бүгінде варикозды тез және қауіпсіз емдеудің тиімді жолы – эндовенозды лазерлік коагуляция. Бұл әдісте ешқандай кесу жасалмайды және науқасты ауруханаға жатқызу қажет емес. Жергілікті анестезиямен теріге кішкентай тілік жасалып, ауру тамырға жұқа лазер талшығы енгізіледі. Лазер сәулесі зақымдалған тамырды «дәнекерлеп», оны қан айналымынан шығарады.

Процедура бірнеше сағат қана созылады, ал науқас сол күні өздігінен жүре алады. Толық қалпына келу үшін бірнеше күн жеткілікті.

Дәрігер пікірі

Орталықта тәжірибелі мамандар жұмыс істейді. Операцияларды астаналық қан тамырлары хирургы Ансар Юсупов жүргізеді. Оның айтуынша, лазерлік ем әсіресе қант диабеті сияқты созылмалы аурулары бар адамдар үшін ыңғайлы, өйткені бұл әдіс денеге аз әсер етеді және анестезияны қажет етпейді.

«Науқастарға операциядан кейін бірнеше күн компрессиялық шұлық кию және таңу курсын өту ұсынылады. Ауруханаға жату қажет емес, келесі күні қалыпты өмірге оралуға болады», – дейді дәрігер.

НАҚТЫ ӨМІРЛІК МЫСАЛ

Жезқазған қаласының тұрғыны Нұржамал Байділдинова ұзақ уақыт бойы аяқ ауырсынуы мен ісінуінен зардап шеккен. Ол МӘМС арқылы тегін емделуге жолдама алып, екі аяққа лазерлік операция жасатты.

"Қазір өзімді жеңіл сезінемін, ауырсыну мен ісіну кетті, өмірім әлдеқайда жақсарды", – дейді Нұржамал.

Маңызы

МӘМС жүйесінің және өңірлерде тамырлы хирургияны дамытудың арқасында жоғары технологиялық медициналық көмек енді тек ірі қалаларда ғана емес, шалғайдағы ауылдарда да қолжетімді. Бұл – көптеген адамдарға ауыр аурудан арылып, белсенді өмірге оралуға мүмкіндік беретін маңызды қадам.

Материал Ұлытау облысының әкімдігімен бірлесіп дайындалды.