«Адал азамат» бағдарламасы: мектептегі тұлғалық дамудың жаңа бағыты

 «Жас ұрпақтың бойына адалдық, әділеттілік және жауапкершілік қасиеттерін сіңіру – біздің басты мақсатымыз. Мектептегі тәрбие жұмысы – болашақ азаматтарды қалыптастырудағы негізгі бағыт». – деп Елбасы Қасым-Жомарт Тоқаев атап өткендей, бұл мақсат бүгінгі таңда Жезқазған қаласының мектептерінде нақты іске асырылуда.

Осы орайда, Жезқазған қаласының білім беру ұйымдары  2025–2026 оқу жылында жаңартылған «Адал азамат» біртұтас тәрбие бағдарламасын жүйелі түрде іске асыруда. Бағдарлама жас ұрпақтың бойына ұлттық құндылықтарды сіңіру, әділеттілік пен жауапкершілік қасиеттерін қалыптастыру, еңбекқор, парасатты және шығармашыл азамат тәрбиелеуді мақсат етеді.

Бағдарламаның стратегиялық негізі үш бағытқа сүйенеді: Әділетті Қазақстан, Адал азамат, Озық ойлы ұлт. Осы бағыттар бойынша мектептерде тәрбие жұмысы алты негізгі құндылыққа негізделген: тәуелсіздік, әділдік, еңбекқорлық, бірлік, тәртіп, жаңашылдық.

Жобалар арқылы тәрбиенің тиімділігі

«Қамқор» жобасы оқушыларды экологиялық жауапкершілік пен қоғамдық қызметке баулиды. «Жер сағаты», «Табиғатқа қамқорлық», «Таза Қазақстан» акциялары жас буынның қоршаған ортаға деген сүйіспеншілігін арттырды.

«Еңбегі адал – жас өрен» жобасы еңбек мәдениетін дамытуға бағытталған. «Жұмысшы мамандықтар жылы» аясында   оқушылар колледждер мен кәсіпорындарда тәжірибелік іс-шараларға қатысып, мамандыққа қызығушылықтарын арттырды.

«Smart Bala» – инновациялық жобалар мен робототехника арқылы балалардың ғылыми және шығармашылық әлеуетін шыңдайды. 

«Шабыт» жобасы шығармашылық және мәдени іс-шараларды қамтиды. «Әншуақ» фестивалі, «Домбыра күні», «Жас сарбаз» патриоттық әндер байқауы арқылы жас өнерпаздар ұлттық мәдениетке қызығушылық танытты.

«Ұшқыр ой алаңы» – пікірсайыс клубтары мен интеллектуалдық ойындар арқылы сыни ойлау қабілетін дамытатын алаң. Қаладағы 26 дебат клубында 2 мыңнан астам оқушы қатысуда.

«Балалар кітапханасы» – кітап оқу мәдениетін насихаттайды. «Тіл тұғыры» жобасы шеңберінде  «Үздік оқырман», «Менің сүйікті кейіпкерім» конкурстары мен  «Тарих LAND» қалалық  жобасы аясындағы  тарихи-мәдени экскурсиялар балалардың рухани дамуына серпін береді.

Сонымен қатар,  бағдарламада ата-аналардың рөлі ерекше. 

 «Ата-аналарды педагогикалық қолдау» орталығы жанынан құрылған «Даналық мектебі» аясында «Ата өсиеті», «Әже даналығы», «Аға қамқорлығы», «Жеңге кеңесі» сынды тәрбиелік іс-шаралар үнемі  ұйымдастырылады. 

2025 жылы өткен қалалық форумда ата-аналар мен педагогтер бала қауіпсіздігі, киберқауіпсіздік және отбасы тәрбиесі мәселелерін бірге талқылады. Форумға Полиция, Төтенше жағдайлар бөлімі, Ішкі саясат, Балаларды қорғау уәкілі және Қорғаныс істер басқармасының өкілдері қатысты.

Бағдарлама шеңберінде  мектептерде «Қауіпсіз қала» және «DOSBOLLIKE» жобалары аясында қауіпсіздік сабақтары мен жаттығулар жүйелі түрде жүргізіледі. Балалар жас ерекшелігіне қарай төтенше жағдайлар, интернет қауіптері, алаяқтық пен тәуекелдерден қорғану бойынша сабақ алады.

  «Адал азамат»  біртұтас  тәрбие  бағдарламасы – мектептегі тәрбие жұмысының жаңа бағыты. Бағдарлама жас ұрпақтың бойына ұлттық құндылықтар мен заманауи дағдыларды дарытып, жауапты, еңбекқор және шығармашыл тұлға қалыптастыруға бағытталған. 

Бағдарлама қазіргі уақытта жүйелі түрде ұйымдастырылуда және жалғасын табуда.

Альмаганбетов Жеңіс Едігеұлы,

Жезқазған қаласы білім бөлімінің басшысы,

ҚР  Білім беру ісінің құрметті қызметкері.