Ұлытау облысында жол-көлік апаттары төмендеді

Ұлытау облысында жол қауіпсіздігін арттыруға бағытталған цифрлық бақылау жүйелерін енгізу нәтижесінде жол-көлік оқиғаларының саны айтарлықтай азайды. Бұл туралы облыстық Полиция департаменті хабарлайды.

2024 жылы өңірде жол апаттары өткен жылмен салыстырғанда 43% төмендеді. Қаза тапқандар саны 41%, ал түрлі дене жарақатын алғандар саны 43% азайған. Мұндай оң динамика жол бойына жаңа жылдамдық өлшейтін камераларды орнату мен патрульдік бақылауды күшейтудің арқасында мүмкін болды.

Ең қауіпті учаскелердің бірі – Жезқазған мен Сәтбаевты байланыстыратын 15 шақырымдық жол. Өткен жылы бұл аумақта 12 ірі апат тіркеліп, 4 адам көз жұмған, 40-қа жуық жолаушы ауыр жарақат алған. Осыған байланысты биыл аталған учаскеге 3 нүктеге 6 жылдамдық өлшеу камерасы орнатылды.

Арман Әбілқасымов, ПД Әкімшілік полиция басқармасы бастығының орынбасары:

«Цифрландыру мақсатында осы екі қаланың арасындағы жолға 6 бейнекамера орнатылды. Соның нәтижесінде жол-көлік оқиғалары биыл 43% төмендеп отыр», – деді.

Қазіргі таңда Ұлытау облысы бойынша 34 жылдамдық өлшейтін камера жұмыс істейді. Сонымен қатар күрежолдарда патруль саны артқан. Жыл басынан бері камералар мен патрульдік топтардың көмегімен 40 мыңнан астам әкімшілік құқықбұзушылық анықталды.

Бұдан бөлек, құқық қорғау органдары жол қозғалысын әуеден бақылау үшін дрондарды кеңінен қолдануда. Биыл дрондар арқылы 300-ге жуық өрескел құқықбұзушылық тіркелген. Оның басым бөлігі — жолдың қарсы бетіне шығу фактілері, бұл апаттардың ең ауыр салдарының негізгі себептерінің бірі саналады.

Алдағы уақытта цифрландыру жұмыстары жалғасады. 2025 жылы облыстағы күрежолдарға қосымша 20-ға жуық жылдамдық өлшейтін камера орнату жоспарланып отыр.

Полиция департаменті өкілдерінің айтуынша, негізгі мақсат — жүргізушілерді айыппұлмен жазалау емес, жолдағы қауіпсіздік мәдениетін қалыптастыру.