Жезқазған қаласында жаңа өрт сөндіру бөлімшесі іске қосылды

Бүгін Ұлытау облысында еліміз бойынша алғашқы Әуе құтқару жасағының салтанатты түрде ашылуы өтті. 

Сонымен қатар облыс орталығы – Жезқазған қаласында жаңа өрт сөндіру бөлімшесі іске қосылды. Айрықша күнде төтеншеліктерге су жаңа техника кілттері мен бірқатар сала қызметкеріне қызметтік пәтерлердің кілттері табыс етілді.

Маңызды шараға ҚР Төтенше жағдайлар министрі Шыңғыс Арынов арнайы қатысып, аймақтың төтенше жағдайларға ден қою әлеуетін арттыру бағытындағы жұмыстардың жоғары деңгейде жүзеге асырылып жатқанын атап өтті.

Ұлытау облысының әкімі Дастан Рыспеков құттықтау сөзінде аталған нысандардың ашылуы өңір қауіпсіздігін қамтамасыз етудегі аса маңызды қадам екенін айтып, қолдау көрсеткен Төтенше жағдайлар министрлігіне және «Қазақмыс» корпорациясына алғыс білдірді.

«Мемлекет басшысы өңірлердің қауіпсіздігін күшейтуге ерекше мән беріп келеді. Бүгін ашылып отырған Әуе құтқару жасағы мен жаңа өрт сөндіру бөлімшесі – осы бағыттағы нақты қадам. Бұл – біздің тұрғындарымыздың қауіпсіздігі мен өмірін қорғауға арналған маңызды инвестиция», – деді өңір басшысы өз сөзінде.

Министр Шыңғыс Арынов өз сөзінде әуе құтқару инфрақұрылымын дамыту жұмыстары жалғасатынын атап өтті.

«Осы үлгідегі жабдықталған тікұшақ ангарларын еліміздің түрлі өңірлерінде ашу жоспарланып отыр. Алғашқы нысанның дәл Ұлытау облысында іске қосылуы – орталық өңірге көрсетілген үлкен қолдау әрі еліміздің төтенше жағдайларға қарсы даярлығын күшейтуге бағытталған нақты қадам», – деді министр.

Салтанатты іс-шара барысында төтенше жағдайлар саласындағы қызметкерлер мен өңірдің белсенді азаматтары арнайы төсбелгілермен және алғысхаттармен марапатталды.

Айта кетейік, биыл Төтенше жағдайлар министрлігі Ұлытау облысына заманауи жабдықталған тікұшақ берген болатын. Бұл өңірдің қиын жағдайларға жедел ден қою мүмкіндігін бірнеше есе арттырды.