​Таза Қазақстан – ортақ жауапкершілік

Тазалық – мәдениетті қоғамның айнасы. Қоршаған ортаның тазалығы мен табиғатқа жанашырлық – ел болашағына жасалған инвестиция. Осы тұрғыда елімізде жүзеге асырылып жатқан «Таза Қазақстан» бастамасы қоғамдық сананы жаңғыртуға бағытталған маңызды қадам болып отыр.

Аталған бастама аясында қалалар мен ауылдарда абаттандыру, көгалдандыру, тұрмыстық қалдықтарды реттеу және экологиялық мәдениетті қалыптастыру бағытында жүйелі жұмыстар жүргізілуде. Сенбіліктер ұйымдастырылып, өзен-көл жағалаулары мен қоғамдық орындар тазартылуда. Бұл шараларға еріктілер, еңбек ұжымдары, жастар мен ардагерлер белсенді түрде қатысуда.

«Таза Қазақстан» – тек бір реттік акция емес, бұл – күнделікті өмір салты. Әр азаматтың өз ауласын, көшесін, туған жерін таза ұстауы елдің экологиялық қауіпсіздігіне тікелей әсер етеді. Табиғатты қорғау – болашақ ұрпақ алдындағы ортақ міндет.

Бүгінде экология мәселесі әлемдік деңгейде өзекті. Сондықтан қоршаған ортаны қорғау мәдениетін қалыптастыру мектептен бастап, еңбек ұжымдары мен қоғамдық ұйымдарда кеңінен насихатталуы тиіс. Бұл бағыттағы ақпараттық-түсіндіру жұмыстары халықтың экологиялық жауапкершілігін арттыруға сеп болуда.

Таза орта – денсаулық кепілі, жайлы өмірдің негізі. «Таза Қазақстан» бастамасы арқылы қоғамда тәртіп пен жауапкершілік, туған жерге деген құрмет қалыптасуда.

Табиғатқа жанашырлық – елге деген сүйіспеншіліктің көрінісі. Таза Қазақстан – әрқайсымыздың қолымызда.