​ҰЛТТЫҚ БІРЛІК ПЕН ҚОҒАМДЫҚ КЕЛІСІМ – ҚАЗАҚСТАННЫҢ ТҰРАҚТЫ ДАМУЫНЫҢ КЕПІЛІ

Қазақстанның басты байлығының бірі – оның бірлігі мен қоғамдық келісімі. Әртүрлі мәдениет пен дәстүр өкілдерінің ортақ мақсат төңірегінде бірігуі елдің тұрақтылығы мен дамуына негіз болады.

Жаңа Конституцияның кіріспесінде біртұтас Қазақстан халқының атынан қабылданғаны атап көрсетілген. Құжатта бірлік пен ынтымақ, этносаралық және конфессияаралық татулық қағидаттарына сүйену мемлекеттің маңызды ұстанымдары ретінде айқындалған.

Ата Заңның 3-бабында жалпыұлттық бірлікті бекемдеу Қазақстан Республикасы қызметінің негіз құраушы қағидаттарының бірі ретінде көрсетілген. Бұл қоғамдағы өзара құрмет пен келісімді нығайтудың мемлекеттік маңызын айқындайды.

Қазақстан қоғамының тұрақтылығы әрбір азаматтың ортақ жауапкершілігіне байланысты. Ұлтына, тіліне, діни көзқарасына немесе әлеуметтік жағдайына қарамастан, барлық азамат заң алдында тең. Конституцияның 16-бабы кемсітуге жол бермейтін теңдік қағидатын бекітеді.

Ұлытау облысы да түрлі этнос өкілдері мекендейтін, ортақ еңбек пен қоғамдық ынтымақтастық қалыптасқан өңір. Жезқазған, Сәтбаев, Қаражал қалаларында және аудандарда қоғамдық келісімді сақтау, мәдени бастамаларды қолдау, жастарды ортақ құндылықтар төңірегінде біріктіру маңызды.

Бірлік тек мерекелік іс-шаралармен өлшенбейді. Ол күнделікті өмірде көршілер арасындағы сыйластықтан, еңбек ұжымындағы өзара түсіністіктен, қоғамдық орындардағы мәдениеттен және ортақ мәселелерді бірлесе шешуден байқалады.

Қоғамдық келісімнің негізінде заңға құрмет, өзара сенім және азаматтық жауапкершілік жатуы тиіс.

Жаңа Конституцияда бекітілген жалпыұлттық бірлік қағидаты Қазақстанның тұтастығын нығайтуға және келешек ұрпаққа бейбіт әрі тұрақты қоғам қалдыруға бағытталған.